Geggjað gott brokkolísalat

 Þetta salat er hrikalega gott, bæði eitt og sér og sem meðlæti. Það passar alveg einstaklega vel með grillkjöti. Það er hægt að slumpa í þetta salat bæta við eða minka eftir því hvað hverjum og einum finnst gott. Magnið sem ég gef hér upp er því eiginlega bara viðmið. Þetta salat er ekkert síðra daginn eftir! 

1 dós sýrður rjómi
slatti af majonesi
safi úr 1/2 lime
1 - 2 msk hvítvíns- eða eplaedik
1/2 rauður laukur
10 stk döðlur
1 epli
1 brokkolí - allt notað, líka stilkurinn. 
3 sneiðar beikon.

Steikið beikonið og kælið. Blandið sýrðum rjóma, majonesi, safa úr lime og ediki saman. Allt annað er saxað niður og blandað saman við. Verði ykkur að góðu.

 

Heimagert kjötfars

Mig er búið að langa svo í kjötfars en þar sem við búum í Noregi þá fæst það ekkert út í búð. Að vísu fæst kjötfars í búðum rétt fyrir jól en það er eitthvað bragð af því sem mér líkar ekki. Svo ég ákvað að búa það til sjálf. Ég var fyrir löngu búin að fá uppskrift en miklaði þetta svo fyrir mér að ég lét aldrei verða af þessu fyrr en ég sá hakk á tilboði í búðinni okkar. Þetta var blanda af nauta- og svínahakki, eitthvað sem ég kaupi aldrei en ákvað að kaupa tvo bakka fyrst þeir væru á tilboði og prófa loksins að gera kjötfars. 

Næsta skref var að lesa aðrar uppskriftir og þær eru sko fjölmargar! Ég sá því að það væri engin ein rétt aðferð til að búa til kjötfars og því ákvað ég að gera "mína eigin". Ég notaði matvinnsluvél til að mauka allt en það er líka hægt að nota bara hrærivél (skv uppskriftum á netinu) en ég gæti trúað að þá verði farsið aðeins grófara. Þegar ég var búin að blanda öllu saman prófaði ég að steikja smá slummu á pönnu, bara til að smakka þetta til og vá hvað þetta varð bragðmikið og gott! Alveg eins og ég vildi hafa þetta - og því skrifa ég þessa færslu, svo ég gleymi ekki uppskriftinni!

400 gr. hakk (hægt er að nota hvaða hakk sem er í rauninni)
1/2 laukur, fínt saxaður
2 msk hveiti
2 msk maizena eða kartöflumjöl
2 tsk lyftiduft
2 tsk salt
2 tsk svartur pipar
1/2 gulrót, rifin
ca 2 dl mjólk (meira eða minna eftir smekk)

All hráefnið er sett í matvinnsluvél sem er látin ganga í nokkrar mínútur. Úr þessu sauð ég svo kjötbollur með hvítkáli og bræddu smjöri. Þá dýfir maður tveimur skeiðum í soðið vatnið - svo farsið festist ekki við þær, og mótar svo bollur sem settar eru ofan í vatnið. Munið að salta vatnið. Suðan látin koma upp og þegar hefur soðið í ca 5 mínútur er slatti af hvítkáli settur ofaní pottinn og soðið áfram í ca 3 mínútur. Borið fram með kartöflum og bræddu smjöri. 

 

Saltfiskréttur

Ég skil eiginlega ekkert í því afhverju við Íslendingar notum ekki saltfisk meira! Ég smakkaði t.d. djúpsteiktan saltfisk í Portúgal í vetur og fannst hann alveg hrikalega góður. Ég ætla allavega að vera duglegri að elda saltfisk í allskonar útgáfum. Kannski við mismikla hrifningu heimilisfólks, en það verður að hafa það!

Þennan saltfiskrétt fékk ég hjá gamalli vinkonu fyrir mörgum árum síðan en hef bara eldað hann
ca þrisvar sinnum síðan kannski mest vegna þess að ég er eiginlega sú eina á heimilinu sem finnst hann rosalega góður.

Í dag prófaði ég að setja hann í eldfast mót og rifinn ost ofaná en það er algjör óþarfi.

Mér finnst best að vera með útvatnaðan saltfisk en það er hægt að hafa léttsaltaðan fisk,
næstursaltaðan eða bara nýjan fisk. Ég hef líka alltaf bara slumpað í þennan rétt en í kvöld lagði ég á minnið hvað ég setti mikið út í. Þið setjið svo bara meira eða minna eftir smekk.

1 stór laukur eða 2 litlir
1 paprika (notaði rauða í kvöld)
1 meðalstór gulrót
1-2 hvítlauksgeirar
1 dós hakkaðir tómatar
2 dl rjómi
400 gr útvatnaður saltfiskur
salt og pipar
smá olía til steikingar

Skerið lauk og papriku í grófa bita og gulrót í sneiðar. Steikið á pönnu í smá olíu þar til þetta mýkist aðeins. Bætið þá pressuðum hvítlauk út í og steikið smá til viðbótar. Bætið svo við hökkuðum tómötum og rjóma og smakkið til með salti og pipar. Hér skiptir líka máli hvernig fisk þið eruð með. Ef notaður er saltfiskur þá þarf ekki mikið salt.
Fiskurinn er skorinn í litla bita og bætt út í. Látið malla í nokkrar mínútur við vægan hita. Rétturinn er nú tilbúinn en ef þið viljið má hella honum í eldfast mót, setja rifinn ost ofaná og inn í 200°c heitan ofn þar til osturinn er bráðnaður.

Með þessu er gott að bera fram soðnar kartöflur og hvítlauksbrauð.

Kjúklingaborgarar

Ég þarf að vera duglegri að setja inn uppskriftir! Ég bara veit það.

Í dag tók ég upp kjúklingabringur án þess að vera búin að ákveða hvað ég ætlaði að elda úr þeim. Eftir smá heilabrot kom það: Kjúklingaborgarar!! Óje! Hef aldrei gert svoleiðis áður (hef hingað til bara stólað á McDonalds) svo það var gúgglað. Endaði svo á uppskrift frá Food Network en afþví að ég á svo erfitt með að fara eftir uppskriftum (aðalega því að ég nenni ekki að vikta allt) þá varð hún pínu, pínu öðruvísi. Eða þið vitið... næstum því alveg eins! Helsti munurinn var að ég var búin að taka upp 4 bringur áður en ég ákvað uppskriftina og því ákvað ég að nota þær allar. Veit ekkert hvað þær voru þungar svo þær voru allar hakkaðar. Ég hakkaði líka laukinn með. Og svo sleppti ég mjólkinni. 4 bringur var allt of mikið fyrir okkur, þetta gerði 9 borgara en það er allt í lagi, restin fór í frysti og verður tekin upp þegar vantar eitthvað fljótlegt.

4 stórar kjúklingabringur
1 lítill laukur eða 1/2 stór
salt (mætti alveg setja 1 1/2 tsk)
pipar
1/4 tsk cayenne pipar
2 bollar brauðrasp
olía til steikingar

Bringurnar eru hakkaðar ásamt lauknum, svo er öllu blandað saman með sleif. Setjið bara uþb helminginn af raspinum út í og geymið restina. Ég notaði bara keyptan rasp og ákvað að láta deigið bíða pínulítið. Það borgaði sig því það þykknaði meira við það. Restin af raspinum er svo sett á disk til að velta borgurunum upp úr fyrir steikingu. Deigið er frekar blautt og klístrað. Maður tekur svo ca 2-3 msk af deigi í lófann og mótar borgara. Má alveg hafa meira eða minna eftir smekk. Þetta er svo steikt á pönnu með olíu á miðlungshita fyrst í ca 5 mínútur á annari hliðinni svo í ca 3 - 4 á hinni. Bætið olíu útá eftir þörfum.
Og þetta er nú allt og sumt! Borðað með hamborgarabrauði, fersku salati, tómötum og hamborgarasósu eða majonesi. Eða bara því sem ykkur langar í.
Ég steingleymdi að taka mynd af tilbúnum borgara í brauði með öllu svo þessi eina af þeim nýsteiktum verður að duga :-)

Íslensk kjötsúpa

Við erum sennilega flest öll vön að gera kjötsúpu með því að nota súpujurtir en það er bara algjörlega ónauðsynlegt. Líklega hefur staðan einhverntíman verið þannig að ekki var búið að finna upp á "súpujurtum" í poka! Þetta er nú bara ágiskun hjá mér :-)

Líkt og á Íslandi er lambakjötstímabilið núna í Noregi, og sjálfsagt víðar. Kjöt er á tilboði í mörgum búðum og því er alveg upplagt að skella í eina kjötsúpu. Smá ábending að ef þið eigið ekki til nægilega stóran pott þá er upplagt að kíkja á nytjamarkaði. Ég fann einn 10 lítra pott í gær með
loki og fékk hann á 20 NOK.

Uppskriftin hér er úr bókinni Matur og Drykkur eftir Helgu Sigurðardóttur. Algjör biblía eldhúsins! Það er bókstaflega allt í þessari bók! Já eða svo gott sem.

Kjötsúpa
3/4 - 1 kg lambakjöt
2 - 2 1/2 l. vatn
1 1/2 msk salt
30 g hrísgrjón
1/2 kg gulrófur
250 g kartöflur
150 g hvítkál
250 g gulrætur
1 msk söxuð steinselja
1 laukur eða blaðlaukur.

Kjötið má hafa í smáum bitum - eða heilum eins og mér líkar það best. Soðið í 25 mínútur (lengur ef bitarnir eru stórir). Grjónin eru þvegin úr köldu vatni og látin út í og soðið áfram í 20 mínútur. Grænmetið er hreinsað og skorið niður í þægilega munnbita og sett út í súpuna síðustu 20 mínúturnar. Saltað meira ef þörf þykir.
Í staðinn fyrir hrísgrjón má líka nota bygggrjón (45 - 50 mín í suðu) eða hafragrjón (5- 10 mín í suðu).

Ef það verður afgangur er gott að skera kjötið niður í passlega bita, blanda því saman við og annað hvort hita upp í næstu máltíð eða setja í ílát (box eða zip-lok poka) og frysta.

Krónhjartarpottréttur

Kjötið léttsteikt

Grænmetið skorið í bita og brúnað létt

Okkur var gefinn bógur af krónhirti um daginn! Þvílík heppni sem það var. En ég hef hvorki smakkað né eldað krónhjartarkjöt áður svo það var allt sett á fullt að finna uppskrift. Flestar uppskriftirnar sem ég fann var með sveppum svo ég var fljót að afskrifa þær nema að ein leit svo ótrúlega vel út að ég ákvað að prófa hana. Hún innihélt kantarellu sveppi og ég ákvað að ég gæti bara tínt þá úr. Mér finnst sveppir sko vondir. En þegar við fórum að versla í matinn, voru þessir sveppir ekki til og ekki heldur vorlaukur sem átti lika að vera í, svo á endanum er rétturinn sem ég eldaði ekki alveg eins og uppskriftin sem ég fann!

Svona endaði þetta:

Ca 800 gr krónhjartarkjöt (eða önnur villibráð)
5 skarlottulaukar
5 dl góður kraftur
2 gulrætur
3 dl rjómi
ca 1/4 blaðlaukur

Rjómi settur út í soðið og svo þykkt með hveiti

1 tsk týttuberjasulta
smá hveiti til að þykkja sósuna

Öllu blandað saman og hitað upp

Þurrkið kjötið og skerið í þunnar skífur. Saltið og piprið og brúnið svo létt á pönnu. Takið svo af pönnunni.
Skerið allt grænmetið í passlega grófa bita og brúnið á pönnu. Hitið vatn með krafti og setjið sultu út í. Öllu er svo blandað saman í potti eða djúpri pönnu og látið malla í smá stund. Tíminn fer aðeins eftir hversu meyrt kjötið er. Ég hugsa að ég hafi soðið þetta í ca 7 mínútur. Ég smakkaði bara einn bitann og fannst hann passlegur! Næst veiðir maður allt kjötið og grænmetið upp (eða hellir soðinu af í pott) og setur rjómann saman við soðið. Smakkið til með salti og pipar. Sósan er látin sjóða smá stund og svo er hún þykkt með hveiti- og vatnsblöndu.

Þetta er svo borðað með soðnum kartöflum og týttuberjasultu.

Píta

Ég hef áður skrifað um bakstur á pítubrauði en í kvöld prófaði ég aðra bakstursaðferð en það var að steikja brauðið á þurri og mjög heitri pönnu og vá hvað það var gott. Það er auðvitað aðeins seinlegra en að baka þau í ofni en alveg þess virði. Ég bjó líka til pítusósuna sjálf en þar sem við búum núna í Noregi þá hef ég ekki fundið neina sósu sem okkur þykir góð í pítu.

Pítubrauð:
3 dl.volgt vatn
1 pk. þurrger
1 tsk. salt
1 tsk. sykur
ca.500 gr. hveiti

Best er að nota ekki allt hveitið strax heldur bara um 400 gr og bæta svo frekar við. Deigið er hnoðað og látið lyfta sér í ca.1 klst.  Þá er deigið hnoðað aftur og því skift í ca. 8 parta. Athugið að með að skipta í 8 hluta eru brauðin frekar lítil en þá væri bara hægt að hafa þau færri, t.d. 7 eða 6. Bara svo þið hafið þetta í huga. Ég rúlla hverjum parti aðeins upp í kúlu og nota svo kökukefli til að fletja það passlega mikið út eða ca 0,5 cm. Þegar búið er að fletja allt út er hvert brauð steikt á mjög heitri pönnu. Ég nota gamla steypujárnspönnu til þess og hef á næstum því alveg hæsta hita. Það þarf að snúa brauðunum nokkrum sinnum við, eða amk 4 sinnum. Þá fara þau nefnilega að lyftast og við það verða þau hol að innan og ekkert mál verður að fylla þau með gúmmelaði.

Pítusósuna gerði ég svona:
ca 3 msk grísk jógúrt (afþví að ég átti hana, annars hefði ég kannski notað sýrðan rjóma)
ca jafnmikið af majónesi
slatti af Herbes de Provence kryddi (ég notaði frá Santa Maria en veit að það eru til sambærileg krydd frá öðrum framleiðendum sem heita þá svipað).
pínu salt.

Hrærið öllu saman og látið standa. Ég gerði sósuna strax eftir að ég var búin að hnoða deigið í pítubrauðið og bragðið af henni var mun betra þegar hún var aðeins búin að standa. Bragðið er alls ekki svo ólíkt pítusósunni eins og við þekkjum hana á Íslandi en mér fannst samt vanta eitthvað uppá. Kannski meira majó... kannski majoram krydd... þetta verður prófað næst.

Svo er bara að steikja eitthvað kjöt - eða ekki. Við notum alltaf nautahakk og svo bara það grænmeti sem manni finnst best.

Arabískur linsugrautur

Ég fór á matreiðslunámskeið í síðustu viku þar sem við lærðum að gera ýmsan arabískan mat. Alveg rosalega góður matur! Eitt af því sem við gerðum var linsugrautur úr rauðum linsum. Við spurðum hvaðan hann væri (kokkarnir voru frá Sómalíu og Palestínu) og þær sögðu að þetta væri bara arabískt. Fínasta svar það.

Í kvöld gerði ég svo þennan graut - fór samt ekki alveg eftir uppskriftinni og þar sem hann varð svo góður ákvað ég að blogga um hann svo ég gleymi ekki hvað ég gerði öðruvísi. Best að setja inn í sviga það sem stendur í uppskriftinni hvað eigi að vera.

2,5 stk laukur
5 stór hvítlauksrif (10 hvítlauksrif)
1 ferskt engifer, ca 5 cm (2,5)
5 msk ólífuolía
2,5 msk turmerik
5 tsk karrí
2.5 msk Garam masala
480 ml rauðar linsur úr dós (10 dl)
5 teningar grænmetiskraftur
slatti af vatni, kannski 4 dl (15 dl vatn) (ákvað að sjá til með þetta!)
2 dósir (eða fernur reyndar) hakkaðir tómatar (2,5 dósir)
2,5 tsk salt
dass af pipar (1,5 tsk)
safi úr 1 lime (safi úr 2,5 stk lime)
ferskur kóriander
jasmín hrísgrjón (basmati hrísgrjón)

Saxið lauk, hvítlauk og engifer smátt niður og steikið þar til það er mjúkt og glært í potti með olíu. Setjið því næst allt kryddið út í (nema kannski salt og pipar) og steikið áfram í 1 mínútu. Næst fara linsur, grænmetiskraftur og tómatar útí. Suðan er látin koma upp og svo er þetta látið sjóða í 20 mínútur. Linsugrauturinn á að vera álíka þykkur og hafragrautur. Smakkið til með salti, pipar og limesafa. Hrærið í af og til svo það festist ekki í botninum. Bætið við vatni og/ eða grænmetiskrafti ef linsunar draga mikið af vökvanum í sig.

Sjóðið hrísgrjón eftir leiðbeiningum og berið fram með grautnum og stráið ferskum kóriander yfir - ef ykkur finnst hann góður. Við borðuðum þetta úr skálum og með skeið.

Með þessu gerði ég hrikalega gott naan brauð, uppskriftina fann ég hér https://veenaazmanov.com/stove-top-homemade-naan-indian-bread/

540 gr hveiti
2,5 tsk þurrger (eitt bréf)
1 tsk sykur
1 tsk olía
1 tsk salt
1 egg
120 ml hrein jógúrt
180 ml heitt vatn (ca 38°c)

Hrærið saman vatni, olíu, sykri og þurrgeri og látið standa í 5 - 10 mínútur þar til það fer að freyða. Blandið þurrefnunum saman á meðan, svo er öllu blandað saman í einu og hnoðað. Ég nota hrærivélina til að hnoða. Deigið er svo látið standa í amk 1 klst og svo er því skipt í 16 hluta. Fletjið hvern hluta fyrir sig í kringlótt flatbrauð og svo eru þau steikt á heitri, þurri pönnu þannig: steikið í 30 sekúndur, snúið, steikið í 30 sekúndur, snúið. Brauðinu er þannig snúið við þrisvar til fjórum sinnum. Okkur finnst svo voða gott að pensla hvert brauð með bræddu smjöri. Það er geymt undir viskastykki þar til öll brauðin eru tilbúin. Ítarlegri leiðbeiningar, ásamt videói, er að finna á síðunni þar sem ég fann uppskriftina.

Mánudagsýsa í útlöndum

Mánudagsýsa á Bessastöðum er í algjöru uppáhaldi hér á þessu heimili en þetta er réttur sem er víst kominn frá Sigrúnu Pétursdóttur, ráðskonu á Bessastöðum og var birtur í DV árið 1988. Það er nánast aldrei afgangur af honum þegar ég elda hann. Mamma eldaði þennan rétt oft og hefur uppskriftin ábyggilega skolast/slípast eitthvað til í gegnum árin. EF þið þekkið ekki þennan rétt þá er hér "upprunalega" uppskriftin: 

Mánudagsýsa á Bessastöðum

• 2 dl hrísgrjón
• nýtt ýsuflak
• rækjur, humar eða skelfisktegundir eftir smekk, efnum og ástæðum.
• 1 dós Campbell's sveppasúpa
• 4 msk majones
• 2 tsk Karrí
• Tæplega einn peli rjóma
• rifinn ostur
• Hrísgjónin soðin og látin í botn á eldföstu móti. Fiskurinn er soðinn og honum raðað yfir grjónin í smábitum. Þá er skelfiskurinn settur yfir. Vökvinn síaður frá sveppunum og þeim raðað yfir. Campbell's súpan og majonesið hrært með karríinu, sveppasoðinu og rjómanum. Þessu er hellt fyrir fiskinn og að lokum er rifnum ostinum stráð yfir. Bakað í 180°c heitum ofni þangað til osturinn brúnast!

En þar sem við búum í útlöndum, þá hefur verið erfitt að finna hráefnið í þennan rétt - þá er ég aðalega að tala um Campbell's súpuna. Er búin að leita út um allt en finn hana ekki. Svo ég varð að gera tilraunir og eftir ca 3 er ég komin með þetta! Það er samt pínu asnalegt, af okkur hér, að kalla þennan rétt Mánudagsýsu á Bessastöðum því að ekki búum við á Bessastöðum, ég elda hann sjaldnast á mánudögum og ég nota aldrei ýsu heldur alltaf þorsk. 

Ég er búin að vera að plana að blogga um þennan rétt í nokkurn tíma en hef alltaf gleymt að taka mynd af honum! Svo þetta fær að standa myndalaust þar til ég smelli af mynd næst þegar ég geri hann. 

Til að gera sósuna nota ég:

• 1 dós Philadelphia ost
• 2 tsk karrí
• 2-4 msk majones
• 4 msk grísk jógúrt eða hrein jógúrt eða súrmjólk eða sýrðan rjóma. 
• slatta af matreiðslurjóma - eða mjólk
• salt og pipar

Aðalmálið er svo að sósan verði passlega þykk - álíka þykk og súrmjólk. Ég set svo soðin hrísgrjón í botn á eldföstu móti. Raða svo HRÁUM þorski yfir (hér er hægt að nota soðinn fisk og gefur það því auga leið að maður gæti fryst afganga af soðnum fiski og notað í réttinn þegar maður vill), helli svo sósunni yfir og strái rifnum osti yfir allt. 

Ég nota ekki rækjur, skelfisk eða sveppi í þetta vegna þess einfaldlega að mér finnst það einfaldlega ekki gott. 

Formið fer svo inn í ofn í ca 30 mínútur. Ferskt salat eða nýbakað brauð/rúgbrauð er tilvalið meðlæti með þessum rétti. 

Að djúpsteikja

Mér finnst djúpsteiktur matur góður. Nema kannski sveppir - hef reyndar ekki prófað þá djúpsteikta en þeir eru ábyggilega jafnvondir og öðruvísi matreiddir.

Ég er samt alls ekki oft með djúpsteiktan mat. Svo sjaldan reyndar að ég þarf iðulega að gúggla hvernig best sé að gera þetta. Svo ég ákvað að gera bloggfærslu. Ég djúpsteikti nefnilega kjúkling um daginn sem tókst svo hrikalega vel að ég hugsaði með mér að nú myndi ég sko muna hvað ég gerði. 

Það eru til nokkrar mismunandi útfærslur að deigi til að djúpsteikja úr, ég veit ekki einu sinni hversu margar eða hvað þær allar heita, en ég gúggla yfirleitt "tempura" eða "orly". Oft innihalda deigin sódavatn, malt eða bjór. Ég er búin að prófa allar að hafa allt þetta þrennt en mitt vandamál er að ég á þetta yfirleitt ekki til. Svo finnst mér lítill munur á bragðinu. Hér er eldri bloggfærsla um djúpsteiktan fisk í orly.

Um daginn djúpsteikti ég s.s. kjúkling. Ég ætlaði að hafa kjúkling í súrsætri sósu og mér finnst þá betra að djúpsteikja fyrst, hvort sem ég nota kjúkling eða svínakjöt, því annars verður kjötið svo þurrt.

Í deigið notaði ég

1 bolla hveiti

1 bolla maísmjöl (maizena)

1 tsk lyftiduft

smá salt
örlítil sojasósa - ca 2 tsk

kalt vatn þar til þetta varð eins og grautur. 

Ég skar svo kjúklinginn í passlega litla bita, lét alla bitana í deigið og lét þá liggja þar í ca 10 mínútur eða þar til olían varð nægilega heit.
Það er hægt að nota þetta deig (eða sambærilegt) til að djúpsteikja kjöt, fisk, laukhringi, humar, rækju eða hvað sem þér dettur í hug. 

Ég nota bara hvaða þá ódýru djúpsteikingarolíu sem ég finn. Ég veit svo sem ekki mikið um olíur
annað en að sumar olíur eru betri til djúpsteikingar en aðrar, því þær þola meiri hita. Annað veit ég ekki. 

Ég hef olíuna ekki á hæsta hita sem er 12 á minni eldavél, heldur stilli ég hana á ca 9 - 10. Til að athuga hvort olían sé nægilega heit er hægt að setja brauðbita ofan í og ef olían kraumar strax mikið við það og bitinn verður tiltölulega fljótlega brúnn, en olían orðin heit. Önnur aðferð, sem ég er farin að nota meira, er að stinga sushi prjóni úr tré ofan í botninn á pottinum og ef

það koma margar loftbólur í kringum prjóninn, er olían orðin heit. 

Ég hélt einu sinni að allt sem væri djúpsteikt þyrfti að steikjast við háan hita og í stuttan tíma. Það er vitleysa! Það sjá ég þegar ég fylgdist með víetnamskri kunningjakonu djúpsteikja heimagerðar vorrúllur. Hún skellti þeim ofan í, svo settist hún bara niður! Rúllan hefur ábyggilega verið alveg í 10 mínútur ofaní og varð alveg hrikalega góð. 

Mér finnst alveg rosalega gott að djúpsteikja sushi rúllur. Þá þarf fyrst og fremst að passa að það sem er inni í rúllunum sé hráefni sem má hitna, eins og t.d. humar, rækjur, djúpsteiktur kjúklingur eða grænmeti. Ekki lax, eða annar fiskur. Þegar olían er orðin heit (og þarna nota ég pönnu sem olíu sem nær amk upp að miðri rúllu), velti ég rúllunni upp úr deigi og svo upp úr brauðraspi og steiki svo. Þá verður rúllan svo
stökk og brakandi. Nammi namm!

Þegar olían er svo orðin köld, nota ég trekt og sikti til þess að hella henni ofan í flöskuna og svo er hægt að nota hana nokkrum sinnum. Á endanum fer ég með flöskuna fulla af olíu á gámavöllinn. 

Kjúklinga og beikon langloka

Ég prófaði nýja uppskrift af pastasalati með kjúkling og beikoni sem var alveg sjúklega gott. Uppskriftin af því er hér: http://princesspinkygirl.com/pasta-salad/2/ (aldrei að vita nema ég pósti uppskriftinni af því á íslensku hér seinna.

En allavega, þetta pastasalat er svo sjúklega gott og er sósan þar í lykilhlutverki svo ég ákvað að færa þetta upp á annað plan - ekkert endilega betra plan, bara annað.

Sósan:

ca 3 msk majones
ca 3 msk sýrður rjómi
ca 1/2 tsk paprikuduft
dass af hvítlauksdufti
smá pipar
og aðalgaldurinn: ca 3 msk af Ranch dressingu.

Allt hrært saman og smakkað til.

Steikið beikon eins og þið viljið hafa það. Þar sem ég var að gera fyrir alla fjölskylduna þá steikti ég það í ofni. Það er algjör snilld sérstaklega ef maður þarf að steikja mikið beikon. Setjið næst beikonið á pappír til að þurrka mestu fituna af því.

Næst þarf að steikja kjúklinginn. Ég skar hann í frekar þunnar sneiðar svona þversum. Náði 3-4 sneiðum úr einni bringu (skar svo hverja sneið í tvennt). Æ, skerið þetta bara eins og þið helst viljið!
Kryddið létt og steikið við háan hita á pönnu.

Ég var búin að ákveða að kaupa nýtt baguette brauð en var of sein að ná í bakaríið og ekkert nýtt til í Krónunni svo ég keypti bara frosin pannini brauð sem ég hitaði í mínútugrillinu þar til það var orðið stökkt að utan. Nammi!

Í brauðið setti ég sósu, salat, kjúkling, beikon, rauðlauk og sósu.

Þetta var alveg rosalega gott. Og væri eflaust enn betra með þykkum sneiðum af tómat með.

Ofnbakaður kjúklingur

Ég heyrði að þessi kjúklingur væri svona bökuð útgáfa af KFC kjúkling, svo ég ákvað að prófa. Ég varð alls ekki fyrir vonbrigðum, en fyrir mína parta myndi ég vilja hafa hjúpinn stökkari svo ég verð bara að gúggla hvernig maður nær því.

Í þetta notar maður kjúklingabringur (eða leggi eða eitthvað). Ég las á netinu að það væri gott að setja kjúkling í mjólk og láta liggja. Ég hef ekki hugmynd um hvort að það geri eitthvað en ég lét bringurnar liggja í ca klst.

1/2 pakki Ritz kex
salt
pipar
eitthvað annað krydd
1 - 2 egg

Ritz kex er sett í matvinnsluvél, eitthvað krydd svo sem salt, pipar, paprikukrydd og laukduft. Það er líka ábyggilega gott að setja Tuc kex í staðinn fyrir Ritz. Þetta er svo maukað saman.

Pískið svo eggið. Ég skar bringurnar í tvennt, það má alveg skera þær meira niður.

Þeim er svo velt upp úr eggjahrærunni og svo ritz kexinu. Raðað á plötu eða í form og bakað við ca 170°c. Eftir ca 20 mín er platan tekin út og kjúklingurinn penslaður með bræddu smjöri. Svo er hann bakaður áfram í 20 mínútur.

Við borðuðum með þessu spínat, fetaost og tómat, piparostasósu og franskar kartöflur. Nammi namm!

Flatbrauð (Naan brauð, Shawarma brauð... eða hvað sem þetta nú heitir)

Ég ákvað að búa til útlenskt flatbrauð - svona eins og hægt er að fá á Subway í Ameríku. Geggjað gott. Ég gúgglaði og gúgglaði en flestar uppskriftirnar sem ég fann voru ómögulegar - fyrir mig sko. Annað hvort var eitthvað hráefni í þeim sem ég átti ekki til eða að mælieiningarnar voru að þvælast fyrir mér. Svo ég bara bjó til mína uppskrift sem heppnaðist svona líka ljómandi vel sem dugar í 4 frekar stórar kökur. Það væri líklega hægt að ná 5 kökum út úr þessu líka - ég er þó ekki viss.

300 gr hveiti,
1 1/2 tsk ger
smá salt
2 msk olía
smá volg mjólk - held að ég hafi sett rúmlega 1 dl
volgt vatn
(marinn hvítlaukur) má sleppa eða setja eitthvað krydd í staðinn.


Allt hnoðað t.d. í vél og bætið vökvanum smátt og smátt úti til að sjá hversu mikið þarf. Látið deigið svo hefast. Næst er deiginu skipt í 4 hluta sem eru flattir út í kringlótta köku sem er svo steikt á þurri pönnu við frekar háan hita. Passið að fletja nógu vel út því þetta lyftist á pönnunni og við viljum ekki hafa þetta of þykkt.

Ég setti kökurnar á disk og undir rakt viskastykki til að halda bæði raka og hita í þeim. Þannig urðu þær líka mjúkar.

Næst steikti ég kjúklingastrimla á pönnu, líka við frekar háan hita. Helminginn af kjúklingnum kryddaði ég, hinn ekki en í lok steikingartímans hellti ég sweet chili sósu út á og lét malla smástund.

Svo raðar maður því sem mann langar í á flatbrauðið, t.d. salati, kjúkling, gúrku, tómötum, lauk og hvaða grænmeti sem er. Ég hafði búið til hvítlauks/gúrkusósu (tatziki) á einfaldan hátt, notaði s.s. sýrðan rjóma, hvítlauk, rifna gúrku, salt og pipar og lét standa á meðan ég eldaði allt hitt. Ég setti reyndar frekar mikinn hvítlauk þannig að það reif í!

Þetta á ég sko pottþétt eftir að gera oftar.

Pizza með hráskinku og klettasalati

Pizza með hráskinku og klettasalati (eða á ítölsku: pizza con prosciutto crudo e rucola) er alveg hrikalega góð. Við fengum að smakka svona í heimahúsi um daginn og kolféllum fyrir henni.

allt komið ofan á nema rifinn ostur

pizzan tilbúin 

Gerið venjulegt pizzadeig, hér er t.d. ein uppskrift:

5 dl hveiti
1 bréf þurrger
smá salt
1 msk olía
2 dl volgt vatn

Allt hnoðað saman og látið hefast. Þetta passar á eina ofnskúffu.

Ofan á deigið er sett ólífuolía - ath EKKI pizzasósa. Þvínæst hvítlaukur, blaðlaukur, hvítmygluostur t.d. höfðingi, rifinn piparostur og svo rifinn pizzaostur yfir allt saman.
Þegar pizzan er svo bökuð setur maður hráskinku ofan á og svo klettasalat yfir allt saman og borðar með bestu lyst! Nammi namm :-)

Kjúklingur í rjómasósu með rauðlauk og sveppum

Ó, þetta er svo gott!
Í þetta nota ég:



1 kjúklingabringa á mann
2 rauðlauka slatta af ferskum sveppum (eftir smekk)
1/2 ltr. rjómi
smá olíu til að steikja


Saxið fyrst rauðlaukinn og sveppina og steikið á pönnu þar til mjúkt. Setjið svo til hliðar þar til seinna.

Næst eru kjúklingabringurnar kryddaðar. Ég notaði þarna kjúklingakrydd - bara af því að ég átti það en ekkert annað sem passaði betur. Steikið bringurnar á pönnu, bara þannig að þær lokist.

Næst fer maukið saman við, ég reyni að láta það fara á milli bitanna. Þá er rjómanum hellt yfir og ég nota alvöru rjóma, en það skiptir sjálfsagt ekki öllu máli.

Þetta er svo soðið á pönnunni, undir loki, í ca 30 mín. Athugið að þessi panna var of lítil, ég þurfti að skipta því að rjóminn sauð uppúr og það hefur ekkert með það að gera að ég skrapp á Facebook rétt á meðan! Það er líka ábyggilega hægt að skella þessu bara í form og inn í heitan ofn.

Mér finnst best að hafa ferskt tagliatelle með þessu en ég er viss um að brún hrísgrjón væru líka æði. Það er líka gott að hafa ferskt salat með þessu - ég bara gleymdi að kaupa það.

Verði ykkur að góðu!