Sítrónukaka með eplamauki

 Ég fékk gefinst fullt af heimagerðu eplamauki sem ég bara vissi ekkert hvað ég ætti að gera við. Ég er ekkert sérstaklega hrifin af eplamauki einu og sér svo ég varð að nota það í bakstur. Eftir mjög mikla leit á netinu fann ég loksins uppskrift á þýsku að þessari köku sem mér leist vel á og í dag ákvað ég að prófa hana. Hún er mjög einföld í gerð en það tekur nokkuð langan tíma að baka hana. Uppskriftina fann ég hér og þar er líka uppskrift af eplamauki sem ég gerði ekki en ég get látið uppskrifina af því fylgja hér. 

Eplamauk: 
1 kg epli
40 gr. smjör

Eplin eru skræld og skorin í grófa bita án kjarnans. Bræðið smjörið og bætið eplunum út í. Sjóðið eplin í smjörinu við vægan hita, með loki ofaná, í ca 15 mínútur þar til þau eru orðin mjög mjúk. Þá er þessu pressað í gegnum sigti og voilá eplamaukið er tilbúið! Það ætti að verða til ca 600 gr af eplamauki úr þessu. Kælið. 

Sítrónukaka:
180 gr. mjúkt smjör
300 gr. hveiti
1 tsk. lyftiduft
160 gr. sykur
1 tsk. vanillusykur
smá salt
1 tsk. fínt rifinn sítrónubörkur (ég setti reyndar ábyggilega heila matskeið og það var rosalega gott)
smá kanill
1 egg. 

Hitið ofinn í 180°c. Allt sett í skál og hnoðað vel í vél. Bökunarpappír er settur á botninn í smelluformog ca helmingnum af deiginu þrýst ofan í botninn og uþb 2 cm upp kantinn. Það er s.s. búinn til kantur fyrir eplamaukið þannig að það leki ekki út við formið. Öllu maukinu er helt yfir botninn og jafnað út. Restinni af deiginu er "sáldrað" yfir, ég keip bara bita og setti hér og það þangað til að ég var búin með allt deigið. Þetta er svo bakað í miðjum ofni í ca 50 mínútur. Þegar kakan er svo orðin köld er gott að sáldra flórsykri yfir.

 Gott að bera þeyttan rjóma með þessari dásemd. 

Kúmenkringlur

 Ég fékk óbeina áskorun... eða ég tók því sem áskorun án þess að viðkomandi hefði nokkurn tíman nefnt mig á nafn, að baka kúmenkringlur. Hér í Noregi finnst mér stundum vanta eitthvað bakkelsi sem er ekki dísætt og ekki bara brauð. Kúmenkringlur koma þar sterkar inní því að ekki bara eru þær góðar eintómar heldur alveg dásamlegar með smjöri og osti, eða bara með grænmeti og soðnu eggi á milli. Sem sagt dásamlegar í nesti. Svo ég hóf að gúggla og ráðfæra mig við bakara því mig langaði bæði í mjúkar og harðar kringlur.
En þar sem að allar uppskrftir sem ég fann á netinu voru með smjöri og

mjólk og mig langaði til að hafa þær vegan, þá ákvað ég bara að trúa bakaranum sem sagði að þetta væri bara "einföld brauðuppskrift í grunninn" og ákvað því að slumpa! Ég slumpa jú alltaf þegar ég baka focaccia brauð og þetta gæti nú ekki verið mikið flóknara. Það sem er mikilvægast - að mínu mati - er að þær séu frekar saltar en sætar og með miklu kúmenbragði. Svo ég slumpaði "meðvitað" þ.e.a.s. ég lagði á minnið hvað ég setti út í svona í tilfelli að þær yrðu góðar! Og OMG hvað þær urðu góðar! Alveg eins og ég vil hafa þær... pínu saltar og með miklu kúmenbragði. Það hefur hins vegar gengið hægt að þurrka þær svo þær verði harðar - en það hlýtur að koma. 

Uppskriftin gefur 7 kringlur ef maður hefur þær um 125 - 130 gr. 

500 gr hveiti
1 bréf þurrger
2 tsk sykur
1.5 tsk salt
2 msk olía
ca 15 gr kúmen (ca 3 msk)
volgt vatn - ég mældi það ekki, en grunar að það hafi verið um 3 dl. 

Þurrefnunum er blandað saman í skál og olíu og volgu vatni helt saman við. Ég nota hrærivél til að hnoða og læt hana ganga í ca 10 mínútur. Setjið svo rakan klút yfir skálina og látið deigið hefast í ca klst. 

Næst er deigið sett á borð og skorið í bita. Ég ákvað að vikta hvern bita svo kringlurnar yrðu jafnar og notaði ég ca 130 gr fyrir hvern bita. Rúllið út í lengu og tengið saman í hring. Gott er að hafa pínu vatn við hliðina til að hjálpa til við að rúlla út (það gengur hægar ef mikið hveiti er á borðinu) sem og við að festa endana saman. Það er samt ekkert því til fyristöðu að búa eitthvað annað til t.d. bara lengjur, fléttu, bollur eða horn. 

Kringlurnar eru látnar hefast í 20 - 30 mínútur áður en þær eru bakaðar í ofni á 220°c í ca 8 mínútur. 

Ef þið viljið hafa kringlurnar harðar þá er betra að baka þær lengi á 160°c þar til þær fá svona fallegan ljósbrúnan lit svo eru þær látnar standa á borði þar til þær þorrna - eða þurrkaðar í ofni á ca 50°c í einn klst. Þið þurfið kannski aðeins að prófa ykkur áfram með þetta - en aðalmálið er bara að þær þorrni alveg í gegn. 

Ég prófaði líka að setja þær í soðið vatn áður en þær eru bakaðar - bara til þess að prófa þetta líka. Það er ekki mikill munur á þeim, þær verða pínu seigar við þetta en alveg jafn góðar. Þetta er pínu meira vesen svo ég held að ég nenni þessu ekki oftar. Og þær verða fallegri þessar sem ekki eru soðnar. 

Soðin kringla er til hægri, venjuleg er til vinsti.

 

Amerískir kleinuhringir

 Ég er búin að vera með svo mikið æði fyrir einhverju djúpsteiktu - hef þó aðalega verið að gúggla og skoða fyrir utan að ég steikti ástarpunga um daginn (og þeir eru bestir með flórsykri yfir). Svo loksins  dreif ég mig í að gera ameríska kleinuhringi. Gúgglaði uppskrift og fann eina þar sem ég sá að ég átti allt hráefnið til svo það var bara að hefjast handa. Þetta er tiltölulega fljótleg uppskrift - auðvitað er þetta gerbakstur svo það þarf að gera ráð fyrir hefingartíma en allt annað er fljótlegt.  

3 dl mjólk
2,5 tsk þurrger
60 gr sykur

2 egg
110 gr smjör - brætt og kælt. 
1 tsk salt
ca 600 gr hveiti

olía til að djúpsteikja

Þunnur glassúr: 280 gr flórsykur, uþb 0,5 dl mjólk, 1/2 tsk vanilludropar. 

Hitið mjólkina í potti upp í ca 35°c, bætið uþb helming af sykri út í og þurrgeri og hrærið í. Látið standa í ca 5 mínútur á meðan þið takið þurrefnið til. 

Eftir þessar 5 mínútur setti ég eggin ofaní mjólkina og hrærði vel. Öllu er svo blandað saman í hrærivélaskál og hnoðað þar til þetta er orðið þétt og fínt. Bætið hveiti útí eftir þörfum. Deigið er látið hefast í uþb 60 mínútur. 

Fletjið deigið svo út í ca 1.5 cm þykkt og skerið út hringi með þar til gerðum hring eða notið glas. Svo er gat skorið út úr miðjunni með minni hring eða skotglasi - allt eftir því hvað til er. Ég hafði t.d. ekki nægilega stórt glas til að skera út stóra hringinn og allt of stóran hring til að skera út gatið. Eftir að hafa skorið út eins og ég gat, tók ég deigið saman og flatti út aftur, passaði að nota ekki mikið hveiti svo það yrði ekki of þurrt. Þegar hér var komið sögu gafst ég upp á glösunum og náði mér í pizzahníf og skar bara lengjur. Hringirnir, "götin" og lengjurnar eru svo látið hefast í uþb. 30 mínútur. Ég setti reyndar "götin" strax í frysti og ætla að prófa að djúpsteikja þau seinna. 

 Hitið olíu í góðum potti og þegar hún er orðin nægilega heit (passið að hún ofhitni ekki) þá eru hringirnir steiktir í tæplega mínútu hvora hlið. 

Kleinuhringjunum er svo dýft ofaní glassúrinn (hann er frekar þunnur) og raðað á bökunarpappír. Einnig er hægt að dýfa þeim ofan í sykur eða flórsykur. Eftir smakksprufur vorum við sammála um að glassúrinn væri bestur. Og stangirnar voru alveg eins á bragðið :-)

Grjónagrautur í ofni og lummur úr afgöngum

 Ég var alveg hætt að elda grjónagraut því að ég hreinlega nennti því ekki, nennti ekki að standa yfir pottinum að hræra í stöðugt í klukkutíma. Svo brann hann alltaf við hvað sem ég gerði. Svo ég hætti. Þar til að ég las að maður geti eldað hann í ofni. Það tók mig nokkrar tilraunir til að finna hvað hentaði mér best og núna er ég bara "oft" með grjónagraut (það er amk 4x á ári). Gerið ráð fyrir amk klukkutíma og passið að pottur og lok megi fara í ofn. Ef það er ekki til er pottþétt hægt að láta suðuna koma upp í potti og hella svo grautnum í eldfast mót og setja álpappír yfir. Ég hef þó ekki prófað það. 

Ég mæli reyndar ekkert alveg alltaf nákvæmlega, þið þurfið kannski bara að prófa ykkur áfram með hvaða magn hentar best. svo er það líka smekksatriði hvað maður vill hafa hann þykkan. Mín uppskrift miðast við 4 fullorðna.

2.5 - 3 dl grautarhrísgrjón
ca 1,3 l. mjólk
smá salt
kannski smá sykur

Kveikið á ofninum á 100 gráður. Allt hráefnið er sett í pott og á hellu. Suðan er látin koma hægt upp og hrærið annað slagið í á meðan. Athugið að því hærri sem hitinn er því meiri líkur er að mjólkin brenni við botninn. Um leið og mjólkin fer að sjóða er potturinn með loki á, settur inn í heitan ofninn. Oftast er grauturinn tilbúinn eftir hálftíma... stundum þarf hann aðeins lengri tíma. Fylgist líka með að mjólkin klárist ekki (svona ef þið mælið hana ekki nákvæmlega). Annars er bara að bæta mjólk útí eftir þörfum. Það er óþarfi að hræra í grautnum á meðan hann er í ofninum. 

Úr afganginum - ef einhver er - geri ég alltaf lummur og nota mikið "slump" aðferðina en hér er uppskrift sem ég styðst við:

1 bolli hveiti
1 tsk lyftiduft
1 - 2 egg (ég nota alltaf 2)
1 tsk kardimommudropar
smá mjólk 
ca 1 - 2 bollar grjónagrautur 
rúsínur 

Allt sett í skál og hrært saman. Ég nota stóra skeið til að setja deigið á pönnu og steiki upp úr blöndu af smjöri og smá olíu á miðlungshita. Um leið og lummurnar eru tilbúnar set ég smá púðursykur ofaná en það er nú bara eitthvað sem ég vandist á að gera. Það er alveg hægt að hafa eitthvað annað; strásykur, flórsykur, sultu eða bara ekkert.

 

Rabarbarabaka

Það er löngu tímabært að setja þessa dásemd á þetta blogg! Þessa böku geri ég amk einu sinni á ári. Ég tek alltaf mikinn rabarbara á vorin og sulta og eða frysti og það er einmitt svo gott að eiga

niðurskorinn rabarbara fyrir þessa böku í frystinum. Þetta er bragðgóð og einföld baka en hún þarf svolítið langan tíma í ofninum. En þá hefur maður bara góðan tíma til að skjótast út í búð eftir rjóma eða ís á meðan. 

400 gr. rabarbari, fremur smátt skorinn er settur í eldfast mót. 

Ég reyndar vikta hann aldrei, set bara passlega mikið í mótið. 

2 stk egg

1 dl hveiti

2 1/2 dl sykur

Egg og sykur þeytt mjög vel saman þar til verður létt og ljóst. Blandið síðan hveitinu varlega saman við. Þessu er síðan hellt yfir rabarbarann

Ofaná:

1 3/4 dl hveiti

1 1/2 dl púðursykur

50 gr smjör

Smjör og sykur hrært vel saman og svo bætið þið hveitinu saman við. Þetta fer síðan ofan á deigið.

Bakað í 45 mínútur við 200°c. Látið aðeins kólna (ef þið getið beðið) og borðið svo með þeyttum rjóma eða ís... eða bara því sem þið viljið.

Mango terta

Þessi er bara guðdómleg!

Fyrsta vegan tertan sem ég geri. Ég elska mango en ég held að þessi sé góð með hvaða ávöxtum sem er og ég bara varð að setja hana hér inn á bloggið svo ég týndi henni ekki því ég er ákveðin í að gera hana aftur þegar jarðaberjatímabilið byrjar.

Ég fékk uppskriftina héðan en breytti henni örlítið svo ég skrifa mína útgáfu hér. Upprunalega útgáfan er glútenlaus en mín er það ekki.

Botninn:
 26 gr kókosmjöl
125 gr hveiti
2 msk (30 gr) kókosolía
2 msk (30 gr) hlynsíróp
1/4 tsk salt

Fylling:
ca 2 dl jurtarjómi t.d. frá Alpro
2 msk hlynsíróp (meira eða minna eftir smekk)
1 tsk vanilludropar
2 þroskuð mangó

Aðferð:
Hitið ofninn í 170°c.
Hitið kókosolíu og hlynsíróp saman. Setjið allt í matvinnsluvél og maukið saman. Deigið er frekar þurrt en það á að vera hægt að klessa því saman á milli fingranna.
Það er svo sett í bökuform, þrýst niður með fingrunum og upp með hliðunum. Passið að hafa nægilega lítið form (ca 9") nú eða annars bara gerið þið bara meira af botninum.
Botninn er svo bakaður í ofni í 12 - 16 mínútur. Því næst er hann tekinn úr forminu og kældur alveg.

Fyllingin:
Þeytið rjómann og bragðbætið með sýrópi og vanilludropum. Skerið mangóið niður í þunnan sneiðar. Rjóminn er settur á botninn og svo raðið þið mangósneiðunum í hring, byrjið á stæstu sneiðunum og setjið yst á tertuna. Raðið svo inn að miðju og endið á minnstu sneiðunum þar.

Kókosbollur / Flødeboller / Skumboller

Ummm, nammi namm hvað þetta eru góðar bollur! Oft finnst mér kókosbollur vera allt of sætar þannig að maður fær bara ógeð eftir eina en þessar eru það ekki. Ég gúgglaði bæði á íslensku, dönsku og norsku, las margar uppskriftir, fékk uppskrift og ráðleggingar frá gömlum skólabróður sem er kokkur og lét loks vaða! Og sé sko ekki eftir því. Í botninn notaði ég kransakökumassa í rúllu. Þá rúllaði ég rúllunni aðeins til að gera hana þynnri og skar svo litlar skífur sem ég bakaði. Það væri líka hægt að nota öðruvísi marsipan (eða það sama), strá flórsykri á borð, fletja marsipanið út og skrera út litla hringi - en því nennti ég alls ekki! Hin aðferðin virkaði líka fínt.

Uppskriftin er því svohljóðandi:

Botn:
400 gr marsipan skorið niður eða stungið út. Bakað við 180°c í ca 7 mínútur.

Fylling:
250 g sykur
75 ml vatn
110 g glykósasýróp (ég notaði frá Dr. Oetker, það kemur í túpum)
140 g gerilsneiddar eggjahvítur

Hjúpur:300 - 400 gr súkkulaði (fer svolítið eftir hversu mikið þið þurfið að smakka áður en það er brætt ;-) )

Eggjahvíturnar eru settar í skál en allt hitt er sett í pott og hitað rólega þar til fer að sjóða. Hér sögðu allar uppskriftir að maður ætti að vera með sykurhitamæli sem ég á ekki til og mér datt ekki til hugar að fara að kaupa fyrir eina uppskrift svo ég ákvað að vera bara óþekk og hunsa þetta ráð! Ef þið eigið hins vegar mæli - eða viljið ekki vera óþekk - þá var talað um að hita þetta upp í 117 gráður. Ég lét þetta bara sjóða í nokkrar mínútur, ég veit ekki, 3-4, allavega þar til sykurinn var alveg uppleystur. Svo er potturinn tekinn af hellunni og lögurinn aðeins látinn kólna - ekki mikið samt. Þá er kominn tími til að stífþeyta eggjahvíturnar. Þegar þær eru orðnar stífar er heitum sykurleginum hellt í mjórri bunu ofaní á meðan hrærivélin þeytir á fullum styrk. Þetta tekur auðvitað smá tíma og það má alls ekki stoppa hrærivélina á meðan því þá falla eggjahvíturnar. Þegar allur lögurinn er kominn saman við, haldið áfram að hræra í ca 5-7 mínútur. Þá er þetta tilbúið.

Það má líka alveg setja eitthvað bragðefni saman við, t.d. vanilludropa, nú eða piparduft! Já eða fínt saxaðan lakkrís. Ég veit samt ekki hvort massinn sé nægilega þéttur til að halda lakkrískurli uppi, en það verður sko prófað næst. Ein uppskriftin sem ég las talaði um vanillustöng og fræ saman við sykurlöginn í pottinum og stangirnar veiddar uppúr áður en maður hellir saman við eggjahvíturnar.

Jæja, þær húsmæður sem eiga til fansí rjómasprautu nota hana að sjálfsögðu, við hinar notum bara plastpoka. Gumsinu er þannig sprautað ofan á kexbotnana og svo er þetta látið standa í amk sólarhring til að þurrka gumsið. Sé ekki tími til að bíða má skella þessu í heitan ofn í smástund til að flýta fyrir þurrkun.

Við að hjúpa held ég að það sé hægt að nota nánast hvaða súkkulaði sem er. Ég keypti nú bara ódýrasta bökunarsúkkulaðið sem ég fann, 2 plötur ljósar og 2 plötur dökkar og bræddi saman. Það sem ég hefði viljað gera er að bæta út í smá palmín- eða kókosfeiti til að þynna súkkulaðið. Það geri ég sko næst. Ég notaði skeið til þess að ausa súkkulaðinu yfir bollurnar sem ég hélt fyrir ofan skálina og svo stráði ég kókos strax yfir.

Bollurnar voru bestar þegar þær voru búnar að standa smá stund.

Brauðstangir / Grissini

Þegar við bjuggum í Danmörku þá keyptum við oft snakk sem samanstóð af litlum brauðstöngum og osti til að dýfa ofaní. Hrikalega gott. Að mig minnti. Um síðustu helgi keypti ég svona aftur og þetta er jú, ennþá gott sem ég skil ekki alveg því þetta er nánast bragðlaust! Samt eitthvað við þetta. Svo ég fór að pæla að það væri nú kannski ekkert svo mikið mál að búa þetta til. Ég átti jú til mjög góðan, hreinan smurost í ísskápnum. Eftir smá gúggl datt ég niður á þessa fínu uppskrift. Þessar brauðstangir eru afskaplega auðveldar og fljótlegar. Og mjög góðar!

1 bolli heitt vatn
1 bréf þurrger
1 tsk sykur
2 msk olía
hveiti
Þessu öllu er hrært saman í skál. Ég mældi ekki hveitið heldur setti bara þartil að þetta varð eins og grautur. Plast er sett yfir skálina og þetta látið hefast í einhverja stund.

1 tsk salt
hveiti - setjið bara nægilega lítið í einu til að sjá hvenær það er tilbúið. En samanlagt er þetta líklega um 1,5 bolli af hveiti.

Krydd að eigin vali. Ég er búin að prófa að setja ekkert krydd, hvítlauksduft og sterkt pizzakrydd. Það síðasta var best.

Þessu öllu er nú hnoðað saman og látið hefast.  Ég bjó svo til þykka rúllu og skar alltaf svipað stóran bút í einu til að rúlla út í lengju. Mér fannst best að rúlla bara milli handanna - eftir að hafa prófað ýmsar aðferðir. Passið bara að hafa þær svipaðar að þykkt svo þær brenni síður. Lengjurnar eru svo settar á bökunarpappír og ég hafði stráð salti á pappírinn svo saltið festist frekar við stangirnar. Annars væri hægt að pensla þær með vatni, mjólk eða eggi til að láta festast betur við. Hér væri hægt að strá ýmsu yfir svosem salti, birkifræjum, sesamfræjum, rifnum osti, parmesan osti eða kryddi.

Bakið við 200°c í ca 10-15 mínútur. Hér þarf að passa að a) gleyma þeim ekki í ofninum (!!!) b) þær brenni ekki c) að hafa þær samt nógu lengi til að þær verði þurrar og stökkar alveg í gegn.

Þetta er snilldarsnakk þegar maður t.d. spilar kínaskák :-)

Súkkulaðikaka með ítölskum marengs

Ókey, mér datt í hug að gera smá tilraun - sem var þó ekki mikil áhætta. Ég studdist sjúklega góðu ístertunni en sleppti ísnum. Ofan á botninn setti ég hrikalega gott krem úr suðusúkkulaði. Þetta bragðaðist bara alveg ljómandi vel, þó svo að það væri ekkert mjög mikið bragð af marengsinum. EF maður ætti nú rjómasprautu væri hægt að útbúa eitthvað fallegt munstur ofan á áður en marengsinn bakast. Og ef maður ætti nú eitthvað ittlaa eða omaggio dót þá væru myndirnar vafalaust MIKLU flottari :-)
við uppskriftina af

Súkkulaðibotn:
125 gr. smjörlíki
300 gr sykur
2 egg
250 gr hveiti
1 tsk lyftiduft
1/2 tsk natron
1 tsk salt
4 msk kakó
2 1/2 dl mjólk

Þeytið sykur og smjörlíki vel saman, bætið eggjum við og svo öllu hinu. Bakað í ca 30-40 mínútur við 180°c í stóru smelluformi. Kakan er svo kæld. 

Súkkulaðikrem:
150 gr suðusúkkulaði 
50 gr smjör
ca 2 tsk sýróp

Allt sett í lítinn pott og brætt saman. Passið að hræra vel í á meðan svo ekki festist við botninn. Á eftir setti ég pottinn ofan í kalt vatn til að kæla kremið áður en það fór á kökuna. Öllu svo hellt yfir kökuna og henni stungið inn í frysti í ca hálftíma eða á meðan marengsinn er búinn til. 

Marengs:
3-4 eggjahvítur
250 gr sykur
100 gr vatn.

Sjóðið vatn og sykur samn í potti í smástund og stífþeytið eggjahvíturnar á meðan (já og kveikið líka á bakaraofninum um leið. Stillið á hæsta hita bara uppi). Þegar eggjahvíturnar eru orðnar þéttar og sykurvatnið búið að sjóða smástund, er vatninu hellt saman við stífar eggjahvíturnar í mjórri bunu og þeytið á meðan og alveg þar til þetta er orðið kalt. ALLS EKKI STOPPA ÞEYTINGUNA ÞVÍ ÞÁ FELLUR DEIGIÐ. Smyrjið þessu svo á tertuna eða sprautið að vilt. Þetta fer svo inn í heitan ofninn í örfáar mínútur - við erum að tala um bara 2 - 4 eða þar til marengsinn er orðinn ljósbrúnn.

Skinkuhorn / pylsuhorn sem ekki þarf að hefast!!

Eruði að grínast með þetta? Afhverju var ekki löngu búið að segja mér að það væri hægt að baka 30 stk pylsuhorn OG 20 stk skinkuhorn á klukkutíma - frá upphafi til ENDA?

Ég er ein af þeim sem gleymi öllum dögum og verð svo alveg geðveikt hissa þegar þeir læðast aftan að mér og birtast bara einn daginn. Þannig hefur það verið með öskudag! Ég hef oftar en ekki verið fram yfir miðnætti að redda grímubúning fyrir strákana.

Þannig var þetta líka í dag. Ég fékk áminningu um að það væri skíðadagur hjá strákunum á MORGUN. Ekki það að ég hafi ekki vitað af því og það var jú alveg þarna einhverstaðar á bakvið en að muna eftir því að skíðadagur þýðir líka mikið nesti? Neibb ekki sjens. Ekki frekar en hin árin. Svo nú voru góð ráð dýr því ég þurfti að redda einhverju miklu en á stuttum tíma. Svo ég ákvað að taka síðustu uppskrift  og aðlaga hana að því sem ég þurfti.

9 dl heitt vatn
6 tsk ger
3 msk sykur

Allt sett í skál, hrært í og svo látið standa í ca 5 mínútur. Eftir þann tíma er farið að freyða vel í þessu. Svo blandar maður

ca 1 kg hveiti - æ ég veit reyndar ekkert hvað ég setti mikið... ég setti bara smá og smá og lét vélina hnoða þar til þetta var passlegt!
2 tsk salt
1 tsk lyftiduft

Hnoðað og svo er þessu skipt í parta - eða maður klípur af til þess að fletja út. Ég byrjaði á pylsuhornunum. Maður fletur deigið út, raðar pylsum ofan á og rúllar upp.

Næst voru skinkuhornin. Ég átti til afgang af Camembert smurosti (geðveikt góður!) í ísskápnum sem ég hrærði saman við smátt skorna skinku og rifinn ost.

Deiginu sem eftir er, er skipt jafnt niður í ca 3 - 4 parta. Flatt út í hring og svo sker maður kross í hringinn og kross aftur þannig að maður er með 8 nokkuð jafna hluta. Skinkuostamauk er sett á breiða endann og svo er rúllað upp frá þeim enda. Penslað yfir með hrærðu eggi og bakað við 180°c þar til þetta er orðið fallega bakað.

Þetta er svooooo gott!
Verði ykkur að góðu!

Sjúklega góð ísterta

Þessa uppskrift sá ég í blaði fyrir mörgum árum síðan, en hef bara gert hana þrisvar sinnum. Aðalega vegna þess að það tekur svo langan tíma að gera hana. Þetta er svosem ekkert vesen samt, en maður þarf bara að gera ráð fyrir góðum tíma (nokkrum dögum).


Uppskriftin er s.s. svona:

Botninn er bara uppáhalds súkkulaðikakan ykkar. Ég nota þessa hér:

125 gr. smjörlíki
300 gr sykur
2 egg
250 gr hveiti
1 tsk lyftiduft
1/2 tsk natron
1 tsk salt
4 msk kakó
2 1/2 dl mjólk

Þeytið sykur og smjörlíki vel saman, bætið eggjum við og svo öllu hinu.
Bakað í einu stóru, eða tveimur litlum formum í ca 40 mín við 175°c. Fyrir þessa tertu baka ég þetta í einu stóru smelluformi. Geri það reyndar alltaf því ég á ekki 2 minni!

Þegar kakan er orðin köld þá er hægt að gera ísinn. Hægt er að nota hvaða uppskrift sem er, en mér finnst þessi sérstaklega góð:
Koníaksís:
1/2 l rjómi
5 egg
1/2 bolli sykur
1/4 dl lagað kaffi
100 gr súkkulaði (spænir eða saxað)
1/2 dl koníak.

Þeytið rjómann og geymið. Þeytið sykurinn og eggin í hrærivélinni í u.þ.b. 8 mín, eða þar til massinn er orðinn léttur. Blanið eggjablöndunni varlega saman við rjómann og bætið að endingu kaffi, súkkulaði og koníak við.

Losið tertuna í smelluforminu og festið það svo aftur. Hellið ísnum yfir. Hjá mér verður ísinn ekki alveg jafnþykkur og kakan en það er allt í lagi, það verður líka afgangur af ísnum sem fer bara í box í frystinn. Setjið tertuna svo í frysti.

Þá er það marengsinn:

3-4 eggjahvítur
250 gr sykur
100 gr vatn.

Sjóðið vatn og sykur samn í potti í smástund og stífþeytið eggjahvíturnar á meðan (já og kveikið líka á bakaraofninum um leið. Stillið á hæsta hita bara uppi). Þegar eggjahvíturnar eru orðnar þéttar og sykurvatnið búið að sjóða smástund, er vatninu hellt saman við stífar eggjahvíturnar í mjórri bunu og þeytið á meðan og alveg þar til þetta er orðið kalt. ALLS EKKI STOPPA ÞEYTINGUNA ÞVÍ ÞÁ FELLUR DEIGIÐ. Smyrjið þessu svo á tertuna eða sprautið að vilt. Þetta fer svo inn í heitan ofninn í örfáar mínútur - við erum að tala um bara 2 - 4 eða þar til marengsinn er orðinn ljósbrúnn.

Gott er að láta kökuna standa í uþb 30 mín áður en hún er skorin.
Verði ykkur að góðu!

Flatbrauð (Naan brauð, Shawarma brauð... eða hvað sem þetta nú heitir)

Ég ákvað að búa til útlenskt flatbrauð - svona eins og hægt er að fá á Subway í Ameríku. Geggjað gott. Ég gúgglaði og gúgglaði en flestar uppskriftirnar sem ég fann voru ómögulegar - fyrir mig sko. Annað hvort var eitthvað hráefni í þeim sem ég átti ekki til eða að mælieiningarnar voru að þvælast fyrir mér. Svo ég bara bjó til mína uppskrift sem heppnaðist svona líka ljómandi vel sem dugar í 4 frekar stórar kökur. Það væri líklega hægt að ná 5 kökum út úr þessu líka - ég er þó ekki viss.

300 gr hveiti,
1 1/2 tsk ger
smá salt
2 msk olía
smá volg mjólk - held að ég hafi sett rúmlega 1 dl
volgt vatn
(marinn hvítlaukur) má sleppa eða setja eitthvað krydd í staðinn.


Allt hnoðað t.d. í vél og bætið vökvanum smátt og smátt úti til að sjá hversu mikið þarf. Látið deigið svo hefast. Næst er deiginu skipt í 4 hluta sem eru flattir út í kringlótta köku sem er svo steikt á þurri pönnu við frekar háan hita. Passið að fletja nógu vel út því þetta lyftist á pönnunni og við viljum ekki hafa þetta of þykkt.

Ég setti kökurnar á disk og undir rakt viskastykki til að halda bæði raka og hita í þeim. Þannig urðu þær líka mjúkar.

Næst steikti ég kjúklingastrimla á pönnu, líka við frekar háan hita. Helminginn af kjúklingnum kryddaði ég, hinn ekki en í lok steikingartímans hellti ég sweet chili sósu út á og lét malla smástund.

Svo raðar maður því sem mann langar í á flatbrauðið, t.d. salati, kjúkling, gúrku, tómötum, lauk og hvaða grænmeti sem er. Ég hafði búið til hvítlauks/gúrkusósu (tatziki) á einfaldan hátt, notaði s.s. sýrðan rjóma, hvítlauk, rifna gúrku, salt og pipar og lét standa á meðan ég eldaði allt hitt. Ég setti reyndar frekar mikinn hvítlauk þannig að það reif í!

Þetta á ég sko pottþétt eftir að gera oftar.