Chilisulta

 Það eru ábyggilega til fullt af uppskriftum af chilisultu en þetta er sú besta sem ég hef smakkað. Hún er mjög einföld og tiltölulega fljótleg í framkvæmd. Það sem mér finnst best við hana er hvað hún er sterk. Ekki þannig að munnurinn logi en maður finnur alveg fyrir chili bragðinu. 

5 rauð chili með fræjum
1 sæt paprika (eða bara venjuleg) 
3 dl sykur
1 dl eplaedik
1-2 appelsínur (ég nota 1)
2 gelatín blöð (matarlím)

Allt er sett í blandara og keyrt þartil þetta er orðið að mauki. Þá er þetta sett í pott og látið malla í 15 - 20 mínútur. Matarlímið er sett í vatn í ca 5 mínútur og þegar sultan hefur soðið eru það sett útí og hrært saman við. Setjið sultuna strax í krukkur og kælið.

Sítrónusmjör (Lemon curd)

Ég er sjálf ekkert fyrir sultur, marmelaði eða neitt svoleiðis en svo smakkaði ég einu sinni sítrónusmjör og jeminn eini hvað það er gott! 

Í gær var til heimabakað súrdeigsbrauð og þar sem ég sat og borðaði það helltist yfir mig löngun í sítrónusmjör. Því var svo reddað í dag. Í hefðbundnu sítrónusmjöri eru egg en þar sem elsti uppáhaldssonurinn er vegan, þá vildi ég að hann gæti líka borðað þetta. Það er jú hann sem er súrdeigsbrauðbakstur snillingurinn á heimilinu. Uppskriftina fann ég á netinu á síðu sem heitir It Doesn't Taste Like Chicken og ég mæli 100% með henni! 

100 gr. sykur         

1 msk maíssterkja

118 gr. vegan mjólk (t.d. soja eða möndlu. Ég notaði Oatly)

65 gr. ferskur sítrónusafi (ca 2 sítrónur)

2 tsk. rifinn sítrónubörkur (af ca 1 sítrónu)

1/8 tsk turmerik (valfrjálst, er bara fyrir litinn)

Blandið saman sykri og maíssterkju og pískið saman til að ná sem mestum kekkjum úr sterkjunni. Blandið öllu hinu saman við og hitið við miðlungshita og hrærið stöðugt í á meðan. Ég hitaði þar til þetta fór að sjóða, þá tók ég af hellunni, það tók ca 5-7 mínútur. Hellið strax í krukku. Þetta geymist í kæli í amk 1 viku (Ég hef ekki prófað að loka krukkunni strax og athuga hvort það geymist lengur, svona eins og sultur gera).

Þetta er dásamlega gott með kexi, brauði, með ostum eða bara ofan á köku. 

 

Kókosbollur / Flødeboller / Skumboller

Ummm, nammi namm hvað þetta eru góðar bollur! Oft finnst mér kókosbollur vera allt of sætar þannig að maður fær bara ógeð eftir eina en þessar eru það ekki. Ég gúgglaði bæði á íslensku, dönsku og norsku, las margar uppskriftir, fékk uppskrift og ráðleggingar frá gömlum skólabróður sem er kokkur og lét loks vaða! Og sé sko ekki eftir því. Í botninn notaði ég kransakökumassa í rúllu. Þá rúllaði ég rúllunni aðeins til að gera hana þynnri og skar svo litlar skífur sem ég bakaði. Það væri líka hægt að nota öðruvísi marsipan (eða það sama), strá flórsykri á borð, fletja marsipanið út og skrera út litla hringi - en því nennti ég alls ekki! Hin aðferðin virkaði líka fínt.

Uppskriftin er því svohljóðandi:

Botn:
400 gr marsipan skorið niður eða stungið út. Bakað við 180°c í ca 7 mínútur.

Fylling:
250 g sykur
75 ml vatn
110 g glykósasýróp (ég notaði frá Dr. Oetker, það kemur í túpum)
140 g gerilsneiddar eggjahvítur

Hjúpur:300 - 400 gr súkkulaði (fer svolítið eftir hversu mikið þið þurfið að smakka áður en það er brætt ;-) )

Eggjahvíturnar eru settar í skál en allt hitt er sett í pott og hitað rólega þar til fer að sjóða. Hér sögðu allar uppskriftir að maður ætti að vera með sykurhitamæli sem ég á ekki til og mér datt ekki til hugar að fara að kaupa fyrir eina uppskrift svo ég ákvað að vera bara óþekk og hunsa þetta ráð! Ef þið eigið hins vegar mæli - eða viljið ekki vera óþekk - þá var talað um að hita þetta upp í 117 gráður. Ég lét þetta bara sjóða í nokkrar mínútur, ég veit ekki, 3-4, allavega þar til sykurinn var alveg uppleystur. Svo er potturinn tekinn af hellunni og lögurinn aðeins látinn kólna - ekki mikið samt. Þá er kominn tími til að stífþeyta eggjahvíturnar. Þegar þær eru orðnar stífar er heitum sykurleginum hellt í mjórri bunu ofaní á meðan hrærivélin þeytir á fullum styrk. Þetta tekur auðvitað smá tíma og það má alls ekki stoppa hrærivélina á meðan því þá falla eggjahvíturnar. Þegar allur lögurinn er kominn saman við, haldið áfram að hræra í ca 5-7 mínútur. Þá er þetta tilbúið.

Það má líka alveg setja eitthvað bragðefni saman við, t.d. vanilludropa, nú eða piparduft! Já eða fínt saxaðan lakkrís. Ég veit samt ekki hvort massinn sé nægilega þéttur til að halda lakkrískurli uppi, en það verður sko prófað næst. Ein uppskriftin sem ég las talaði um vanillustöng og fræ saman við sykurlöginn í pottinum og stangirnar veiddar uppúr áður en maður hellir saman við eggjahvíturnar.

Jæja, þær húsmæður sem eiga til fansí rjómasprautu nota hana að sjálfsögðu, við hinar notum bara plastpoka. Gumsinu er þannig sprautað ofan á kexbotnana og svo er þetta látið standa í amk sólarhring til að þurrka gumsið. Sé ekki tími til að bíða má skella þessu í heitan ofn í smástund til að flýta fyrir þurrkun.

Við að hjúpa held ég að það sé hægt að nota nánast hvaða súkkulaði sem er. Ég keypti nú bara ódýrasta bökunarsúkkulaðið sem ég fann, 2 plötur ljósar og 2 plötur dökkar og bræddi saman. Það sem ég hefði viljað gera er að bæta út í smá palmín- eða kókosfeiti til að þynna súkkulaðið. Það geri ég sko næst. Ég notaði skeið til þess að ausa súkkulaðinu yfir bollurnar sem ég hélt fyrir ofan skálina og svo stráði ég kókos strax yfir.

Bollurnar voru bestar þegar þær voru búnar að standa smá stund.

Brauðstangir / Grissini

Þegar við bjuggum í Danmörku þá keyptum við oft snakk sem samanstóð af litlum brauðstöngum og osti til að dýfa ofaní. Hrikalega gott. Að mig minnti. Um síðustu helgi keypti ég svona aftur og þetta er jú, ennþá gott sem ég skil ekki alveg því þetta er nánast bragðlaust! Samt eitthvað við þetta. Svo ég fór að pæla að það væri nú kannski ekkert svo mikið mál að búa þetta til. Ég átti jú til mjög góðan, hreinan smurost í ísskápnum. Eftir smá gúggl datt ég niður á þessa fínu uppskrift. Þessar brauðstangir eru afskaplega auðveldar og fljótlegar. Og mjög góðar!

1 bolli heitt vatn
1 bréf þurrger
1 tsk sykur
2 msk olía
hveiti
Þessu öllu er hrært saman í skál. Ég mældi ekki hveitið heldur setti bara þartil að þetta varð eins og grautur. Plast er sett yfir skálina og þetta látið hefast í einhverja stund.

1 tsk salt
hveiti - setjið bara nægilega lítið í einu til að sjá hvenær það er tilbúið. En samanlagt er þetta líklega um 1,5 bolli af hveiti.

Krydd að eigin vali. Ég er búin að prófa að setja ekkert krydd, hvítlauksduft og sterkt pizzakrydd. Það síðasta var best.

Þessu öllu er nú hnoðað saman og látið hefast.  Ég bjó svo til þykka rúllu og skar alltaf svipað stóran bút í einu til að rúlla út í lengju. Mér fannst best að rúlla bara milli handanna - eftir að hafa prófað ýmsar aðferðir. Passið bara að hafa þær svipaðar að þykkt svo þær brenni síður. Lengjurnar eru svo settar á bökunarpappír og ég hafði stráð salti á pappírinn svo saltið festist frekar við stangirnar. Annars væri hægt að pensla þær með vatni, mjólk eða eggi til að láta festast betur við. Hér væri hægt að strá ýmsu yfir svosem salti, birkifræjum, sesamfræjum, rifnum osti, parmesan osti eða kryddi.

Bakið við 200°c í ca 10-15 mínútur. Hér þarf að passa að a) gleyma þeim ekki í ofninum (!!!) b) þær brenni ekki c) að hafa þær samt nógu lengi til að þær verði þurrar og stökkar alveg í gegn.

Þetta er snilldarsnakk þegar maður t.d. spilar kínaskák :-)

Guðdómlegur ostur

Ég fæ alltaf vatn í munninn þegar ég hugsa um þennan rétt, því hann er alveg guðdómlega góður. Erna vinkona gaf mér að smakka þetta og ég át á mig gat!
Þetta var það eina sem mig langaði í í kvöldmatinn í kvöld. Ég veit ekkert sérstaklega hollt... ég sem ætlaði að fara í pásu í hvítum sykri, hvítu hveiti og geri en hugga mig við að... hmm... ja... mjólk er holl! Ég byrja bara í pásu á morgun!

Í þennan rétt notar maður 1 stóran hvítmygluost. Ég notaði Ljúfling. Smábrauð og sýróp.

Fyrst tekur maður brauð t.d. brauðbollur (svona smábrauð), sker það niður í ca 4 bita og raðar á plötu. dreytir smá olíu yfir og saltar. Þetta er svo bakað í ofni í jah, ca 15 - 20 mínútur við 180°c. Ég tók nú ekki tímann á þessu en þegar brauðið er aðeins farið að gyllast þá er það tilbúið.

Næst græjar maður ostinn. Setjið hann í eldfast mót, setjið smá olíu yfir og svo vel af svörtum pipar og smá salt (ja, dass af salti). Osturinn fer svo inn í ofninn og bakast í einhvern tíma. Aftur tók ég ekki tímann og tók minn ost aðeins of fljótt út, hann var ekki orðinn heitur í gegn en þá var líka bara allt í lagi að setja hann inn aftur.

Maður notar svo brauðstangirnar til að dýfa ofan í ostinn og svo það allra besta - að dýfa öllu dótinu ofan í sýróp, t.d. Maple syrup.

Verði ykkur að góðu!

Heimagert granóla

Ég elska heimagert granóla en ég borða það ekki með mjólk heldur bý ég til bita og borða þá eins og snakk. Ef þú vilt ekki geta bita heldur hafa þetta laust eins og múslí þá á að sleppa eggjahvítunni og hræra í blöndunni  annað slagið á meðan hún bakast.

2 bollar tröllahafrar
1 tsk salt
1 tsk kanill
Slatti af hnetum, möndlum, fræjum og kókosflögum. Mér finnst gott að hafa hnetur og möndlur heilar - en stundum brýt ég þær.

Allt sett saman í skál og blandað vel.

Í aðra skál blandast

1/3 bolli olía (kókos eða ólífuolía)
1/3 bolli hunang
1 msk hlynsýróp eða agave - ekki nauðsynlegt en mjög gott.
1 tsk vanilludropar
1 eggjahvíta - Ekki ef þið viljið hafa þetta laust.

Á leið í ofninn

Hellið þessu svo yfir þurrefnin og blandið. Öllu er svo hellt á plötu með bökunarpappír og jafnað út. Mér finnst þetta bakast betur ef ég set svona rákir í blönduna. Bakast svo í ofni við ca 180°c í uþb. 15 mínútur. Passið þetta samt því þetta brennur auðveldlega. Væri kannski gott að baka þetta við lægri hita... hmm... ætti að prófa það næst!

Þegar þetta er svo orðið kalt er þetta brotið í hæfilega bita og sett í ílát með þéttu loki, þá helst þetta frekar stökkt.

Tilbúið Granóla - á bara eftir að kólna og brjóta í bita

Tacobaka með guacamole

 Ég fann þessa frábæru uppskrift af tacoböku um daginn og ákvað strax að prófa. Hún er inni á http://ljufmeti.com/2012/08/17/tacobaka/
og ég ætla ekkert að vera að endurtaka hana hér heldur hvet ég ykkur til að fara á þessa síðu og skoða líka aðrar uppskriftir þarna. Fullt af girnilegum uppskriftum.

En ég ákvað að hafa heimagert guacamole með sem ég elska, og nota uppskrift sem ég fékk frá Gullu vinkonu. Þetta er geggjað gott guacamole en ég hef aldrei áður prófað það með mat, heldur bara með snakki. En það passaði alveg rosalega vel með bökunni.

3-4 vel þroskuð avocado, stöppuð með gaffli eða nota töfrasprota létt. Það er sjálfsagt misjafnt hvað fólk vill hafa þetta maukað, ég vil hafa
þetta eins og stappað.
1/2 laukur (ég nota alltaf rauðlauk)
safi úr einu lime (eða kannski tæplega það)
Slatti af ferskum kóriander
1/8 tsk cumin-duft
1 ferskur rauður chili-pipar og ég mæli sterklega
með því að nota hanska!!! Fjarlægið fræin og saxið
smátt
salt og pipar
1/2 - 1 tómatur, saxaður - takið samt gumsið úr.

Öllu blandað saman og smakkað til.
Gott að láta standa smá áður en þetta er borðað.

Ég bakaði bökuna í alveg 30 mínútur en þá fannst mér hún líta út fyrir að vera tilbúin.

Það var líka höfuðverkur að ná henni úr forminu - þar sem þetta var í fyrsta skipti sem ég baka svona böku, en það hafðist að lokum með því að hvolfa disk ofan á, sveifla bökunni á hvolf, taka þá formið og skella öðrum disk í staðinn og hvolfa aftur.

Við borðuðum þetta svo með Doritos snakki, smá feta osti (sem átti að vera með grænmetinu sem gleymdist að kaupa) og guacamole. Dásamlega gott!

Tortilla snakk

Tortillakökur eru penslaðar með olíu - bara létt, og það nægir að pensla eina, setja svo aðra ofaná og láta olíuna af þeirri neðri smitast á þá efri. Svo eru þær skornar í þríhyrninga, raðað á plötu (kannski með bökunarpappír undir), strá salti yfir (best er Maldon salt því það er ekki svo hart) og bakað við ca 200 gr. þar til þær eru orðnar gylltar. Þær eru mjög fljótar að verða of mikið bakaðar svo það er gott að standa yfir þeim. Þetta tekur samt amk 5 mín.
Það er líka hægt að djúpsteikja þær, þá penslar maður þær ekki. Ég er bara búin að prófa það einu sinni en fannst það ekkert sérstakt. En ég var ekki með mjög góða olíu til þess og var með allt of mikinn hita á olíunni svo þær urðu of dökkar. Ætla nú að prófa þetta aftur seinna.