Pintrest

Saturday, 8 September 2018

Mánudagsýsa í útlöndum

Mánudagsýsa á Bessastöðum er í algjöru uppáhaldi hér á þessu heimili en þetta er réttur sem er víst kominn frá Sigrúnu Pétursdóttur, ráðskonu á Bessastöðum og var birtur í DV árið 1988. Það er nánast aldrei afgangur af honum þegar ég elda hann. Mamma eldaði þennan rétt oft og hefur uppskriftin ábyggilega skolast/slípast eitthvað til í gegnum árin. EF þið þekkið ekki þennan rétt þá er hér "upprunalega" uppskriftin: 

Mánudagsýsa á Bessastöðum
    • 2 dl hrísgrjón
    • nýtt ýsuflak
    • rækjur, humar eða skelfisktegundir eftir smekk, efnum og ástæðum.
    • 1 dós Campbell's sveppasúpa
    • 4 msk majones
    • 2 tsk Karrí
    • Tæplega einn peli rjóma
    • rifinn ostur
    • Hrísgjónin soðin og látin í botn á eldföstu móti. Fiskurinn er soðinn og honum raðað yfir grjónin í smábitum. Þá er skelfiskurinn settur yfir. Vökvinn síaður frá sveppunum og þeim raðað yfir. Campbell's súpan og majonesið hrært með karríinu, sveppasoðinu og rjómanum. Þessu er hellt fyrir fiskinn og að lokum er rifnum ostinum stráð yfir. Bakað í 180°c heitum ofni þangað til osturinn brúnast!
En þar sem við búum í útlöndum, þá hefur verið erfitt að finna hráefnið í þennan rétt - þá er ég aðalega að tala um Campbell's súpuna. Er búin að leita út um allt en finn hana ekki. Svo ég varð að gera tilraunir og eftir ca 3 er ég komin með þetta! Það er samt pínu asnalegt, af okkur hér, að kalla þennan rétt Mánudagsýsu á Bessastöðum því að ekki búum við á Bessastöðum, ég elda hann sjaldnast á mánudögum og ég nota aldrei ýsu heldur alltaf þorsk. 

Ég er búin að vera að plana að blogga um þennan rétt í nokkurn tíma en hef alltaf gleymt að taka mynd af honum! Svo þetta fær að standa myndalaust þar til ég smelli af mynd næst þegar ég geri hann. 

Til að gera sósuna nota ég:
    • 1 dós Philadelphia ost
    • 2 tsk karrí
    • 2-4 msk majones
    • 4 msk grísk jógúrt eða hrein jógúrt eða súrmjólk eða sýrðan rjóma. 
    • slatta af matreiðslurjóma - eða mjólk
    • salt og pipar
Aðalmálið er svo að sósan verði passlega þykk - álíka þykk og súrmjólk. Ég set svo soðin hrísgrjón í botn á eldföstu móti. Raða svo HRÁUM þorski yfir (hér er hægt að nota soðinn fisk og gefur það því auga leið að maður gæti fryst afganga af soðnum fiski og notað í réttinn þegar maður vill), helli svo sósunni yfir og strái rifnum osti yfir allt. 

Ég nota ekki rækjur, skelfisk eða sveppi í þetta vegna þess einfaldlega að mér finnst það einfaldlega ekki gott. 

Formið fer svo inn í ofn í ca 30 mínútur. Ferskt salat eða nýbakað brauð/rúgbrauð er tilvalið meðlæti með þessum rétti. 

Friday, 9 February 2018

Kalt pastasalat með kjúkling og beikoni

Ég eldaði heilan kjúkling í gær. Gerði reyndar þennan hér:  Franskur heilsteiktur kjúklingur með rósmarín, hvítlauk og sítrónum, sem er alltaf góður. Það varð alveg heilt læri afgangs, plús smá kjöt hér og þar sem hægt var að tæta af. Semsagt eiginlega alveg heill hellingur. Og þá var bara að finna út úr hvað best væri að gera úr þessu. Mig langaði allra mest í svona "salatbar fíling", þ.e. fullt af einhverju samsulli ásamt pasta með kaldri sósu. En nú voru góð ráð dýr því ég kann enga svoleiðis uppskrift. Eftir mikið gúggl ákvað ég að prófa mig bara áfram. Úr varð stórkostlega gott pastasalat með ýmsu góðgæti. Svo gott að ég ákvað að ég yrði bara að skrifa þetta niður áður en ég gleymdi uppskriftinni. Sem er reyndar varla uppskrift því þetta snerist um að slumpa og smakka.

Sósan varð því svona:

ca 3 msk grísk jógúrt
ca 2 msk majones
ca 1 tsk hunang
1/2 tsk dijon sinnep
salt
pipar
oregano
timian
hvítlauksduft
hvítlaukssalt
steinselja

Öllu hrært saman og látið standa smá.

Pasta er svo soðið og kælt. Blandið svo sósunni saman við kalt pastað. Saman við þetta setti ég svo beikon, kjúkling, niðurskorna skinku og alla 5 kirsuberjatómatana sem ég fann í ísskápnum. Þetta var svo sett á disk ásamt salatblöndu, spínati, papriku, gúrku og rauðlauk. Hefði verið svo alveg guðdómlegt að hafa fetaost með - en það fattaðist ekki fyrr en við vorum byrjuð að borða! Man eftir því næst.

Friday, 19 May 2017

Kókosbollur / Flødeboller / Skumboller

Ummm, nammi namm hvað þetta eru góðar bollur! Oft finnst mér kókosbollur vera allt of sætar þannig að maður fær bara ógeð eftir eina en þessar eru það ekki. Ég gúgglaði bæði á íslensku, dönsku og norsku, las margar uppskriftir, fékk uppskrift og ráðleggingar frá gömlum skólabróður sem er kokkur og lét loks vaða! Og sé sko ekki eftir því. Í botninn notaði ég kransakökumassa í rúllu. Þá rúllaði ég rúllunni aðeins til að gera hana þynnri og skar svo litlar skífur sem ég bakaði. Það væri líka hægt að nota öðruvísi marsipan (eða það sama), strá flórsykri á borð, fletja marsipanið út og skrera út litla hringi - en því nennti ég alls ekki! Hin aðferðin virkaði líka fínt.

Uppskriftin er því svohljóðandi:

Botn:
400 gr marsipan skorið niður eða stungið út. Bakað við 180°c í ca 7 mínútur.

Fylling:
250 g sykur
75 ml vatn
110 g glykósasýróp (ég notaði frá Dr. Oetker, það kemur í túpum)
140 g gerilsneiddar eggjahvítur

Hjúpur:300 - 400 gr súkkulaði (fer svolítið eftir hversu mikið þið þurfið að smakka áður en það er brætt ;-) )

Eggjahvíturnar eru settar í skál en allt hitt er sett í pott og hitað rólega þar til fer að sjóða. Hér sögðu allar uppskriftir að maður ætti að vera með sykurhitamæli sem ég á ekki til og mér datt ekki til hugar að fara að kaupa fyrir eina uppskrift svo ég ákvað að vera bara óþekk og hunsa þetta ráð! Ef þið eigið hins vegar mæli - eða viljið ekki vera óþekk - þá var talað um að hita þetta upp í 117 gráður. Ég lét þetta bara sjóða í nokkrar mínútur, ég veit ekki, 3-4, allavega þar til sykurinn var alveg uppleystur. Svo er potturinn tekinn af hellunni og lögurinn aðeins látinn kólna - ekki mikið samt. Þá er kominn tími til að stífþeyta eggjahvíturnar. Þegar þær eru orðnar stífar er heitum sykurleginum hellt í mjórri bunu ofaní á meðan hrærivélin þeytir á fullum styrk. Þetta tekur auðvitað smá tíma og það má alls ekki stoppa hrærivélina á meðan því þá falla eggjahvíturnar. Þegar allur lögurinn er kominn saman við, haldið áfram að hræra í ca 5-7 mínútur. Þá er þetta tilbúið.

Það má líka alveg setja eitthvað bragðefni saman við, t.d. vanilludropa, nú eða piparduft! Já eða fínt saxaðan lakkrís. Ég veit samt ekki hvort massinn sé nægilega þéttur til að halda lakkrískurli uppi, en það verður sko prófað næst. Ein uppskriftin sem ég las talaði um vanillustöng og fræ saman við sykurlöginn í pottinum og stangirnar veiddar uppúr áður en maður hellir saman við eggjahvíturnar.

Jæja, þær húsmæður sem eiga til fansí rjómasprautu nota hana að sjálfsögðu, við hinar notum bara plastpoka. Gumsinu er þannig sprautað ofan á kexbotnana og svo er þetta látið standa í amk sólarhring til að þurrka gumsið. Sé ekki tími til að bíða má skella þessu í heitan ofn í smástund til að flýta fyrir þurrkun.

Við að hjúpa held ég að það sé hægt að nota nánast hvaða súkkulaði sem er. Ég keypti nú bara ódýrasta bökunarsúkkulaðið sem ég fann, 2 plötur ljósar og 2 plötur dökkar og bræddi saman. Það sem ég hefði viljað gera er að bæta út í smá palmín- eða kókosfeiti til að þynna súkkulaðið. Það geri ég sko næst. Ég notaði skeið til þess að ausa súkkulaðinu yfir bollurnar sem ég hélt fyrir ofan skálina og svo stráði ég kókos strax yfir.

Bollurnar voru bestar þegar þær voru búnar að standa smá stund.










Thursday, 18 May 2017

Brauðstangir / Grissini

Þegar við bjuggum í Danmörku þá keyptum við oft snakk sem samanstóð af litlum brauðstöngum og osti til að dýfa ofaní. Hrikalega gott. Að mig minnti. Um síðustu helgi keypti ég svona aftur og þetta er jú, ennþá gott sem ég skil ekki alveg því þetta er nánast bragðlaust! Samt eitthvað við þetta. Svo ég fór að pæla að það væri nú kannski ekkert svo mikið mál að búa þetta til. Ég átti jú til mjög góðan, hreinan smurost í ísskápnum. Eftir smá gúggl datt ég niður á þessa fínu uppskrift. Þessar brauðstangir eru afskaplega auðveldar og fljótlegar. Og mjög góðar!

1 bolli heitt vatn
1 bréf þurrger
1 tsk sykur
2 msk olía
hveiti
Þessu öllu er hrært saman í skál. Ég mældi ekki hveitið heldur setti bara þartil að þetta varð eins og grautur. Plast er sett yfir skálina og þetta látið hefast í einhverja stund.

1 tsk salt
hveiti - setjið bara nægilega lítið í einu til að sjá hvenær það er tilbúið. En samanlagt er þetta líklega um 1,5 bolli af hveiti.

Krydd að eigin vali. Ég er búin að prófa að setja ekkert krydd, hvítlauksduft og sterkt pizzakrydd. Það síðasta var best.

Þessu öllu er nú hnoðað saman og látið hefast.  Ég bjó svo til þykka rúllu og skar alltaf svipað stóran bút í einu til að rúlla út í lengju. Mér fannst best að rúlla bara milli handanna - eftir að hafa prófað ýmsar aðferðir. Passið bara að hafa þær svipaðar að þykkt svo þær brenni síður. Lengjurnar eru svo settar á bökunarpappír og ég hafði stráð salti á pappírinn svo saltið festist frekar við stangirnar. Annars væri hægt að pensla þær með vatni, mjólk eða eggi til að láta festast betur við. Hér væri hægt að strá ýmsu yfir svosem salti, birkifræjum, sesamfræjum, rifnum osti, parmesan osti eða kryddi.

Bakið við 200°c í ca 10-15 mínútur. Hér þarf að passa að a) gleyma þeim ekki í ofninum (!!!) b) þær brenni ekki c) að hafa þær samt nógu lengi til að þær verði þurrar og stökkar alveg í gegn.

Þetta er snilldarsnakk þegar maður t.d. spilar kínaskák :-)

Thursday, 6 April 2017

Að djúpsteikja

Mér finnst djúpsteiktur matur góður. Nema kannski sveppir - hef reyndar ekki prófað þá djúpsteikta en þeir eru ábyggilega jafnvondir og öðruvísi matreiddir.
Ég er samt alls ekki oft með djúpsteiktan mat. Svo sjaldan reyndar að ég þarf iðulega að gúggla hvernig best sé að gera þetta. Svo ég ákvað að gera bloggfærslu. Ég djúpsteikti nefnilega kjúkling um daginn sem tókst svo hrikalega vel að ég hugsaði með mér að nú myndi ég sko muna hvað ég gerði. 

Það eru til nokkrar mismunandi útfærslur að deigi til að djúpsteikja úr, ég veit ekki einu sinni hversu margar eða hvað þær allar heita, en ég gúggla yfirleitt "tempura" eða "orly". Oft innihalda deigin sódavatn, malt eða bjór. Ég er búin að prófa allar að hafa allt þetta þrennt en mitt vandamál er að ég á þetta yfirleitt ekki til. Svo finnst mér lítill munur á bragðinu. Hér er eldri bloggfærsla um djúpsteiktan fisk í orly.

Um daginn djúpsteikti ég s.s. kjúkling. Ég ætlaði að hafa kjúkling í súrsætri sósu og mér finnst þá betra að djúpsteikja fyrst, hvort sem ég nota kjúkling eða svínakjöt, því annars verður kjötið svo þurrt.

Í deigið notaði ég
1 bolla hveiti
1 bolla maísmjöl (maizena)
1 tsk lyftiduft
smá salt
örlítil sojasósa - ca 2 tsk
kalt vatn þar til þetta varð eins og grautur. 

Ég skar svo kjúklinginn í passlega litla bita, lét alla bitana í deigið og lét þá liggja þar í ca 10 mínútur eða þar til olían varð nægilega heit.
Það er hægt að nota þetta deig (eða sambærilegt) til að djúpsteikja kjöt, fisk, laukhringi, humar, rækju eða hvað sem þér dettur í hug. 

Ég nota bara hvaða þá ódýru djúpsteikingarolíu sem ég finn. Ég veit svo sem ekki mikið um olíur
annað en að sumar olíur eru betri til djúpsteikingar en aðrar, því þær þola meiri hita. Annað veit ég ekki. 
Ég hef olíuna ekki á hæsta hita sem er 12 á minni eldavél, heldur stilli ég hana á ca 9 - 10. Til að athuga hvort olían sé nægilega heit er hægt að setja brauðbita ofan í og ef olían kraumar strax mikið við það og bitinn verður tiltölulega fljótlega brúnn, en olían orðin heit. Önnur aðferð, sem ég er farin að nota meira, er að stinga sushi prjóni úr tré ofan í botninn á pottinum og ef
það koma margar loftbólur í kringum prjóninn, er olían orðin heit. 

Ég hélt einu sinni að allt sem væri djúpsteikt þyrfti að steikjast við háan hita og í stuttan tíma. Það er vitleysa! Það sjá ég þegar ég fylgdist með víetnamskri kunningjakonu djúpsteikja heimagerðar vorrúllur. Hún skellti þeim ofan í, svo settist hún bara niður! Rúllan hefur ábyggilega verið alveg í 10 mínútur ofaní og varð alveg hrikalega góð. 

Mér finnst alveg rosalega gott að djúpsteikja sushi rúllur. Þá þarf fyrst og fremst að passa að það sem er inni í rúllunum sé hráefni sem má hitna, eins og t.d. humar, rækjur, djúpsteiktur kjúklingur eða grænmeti. Ekki lax, eða annar fiskur. Þegar olían er orðin heit (og þarna nota ég pönnu sem olíu sem nær amk upp að miðri rúllu), velti ég rúllunni upp úr deigi og svo upp úr brauðraspi og steiki svo. Þá verður rúllan svo
stökk og brakandi. Nammi namm!
Þegar olían er svo orðin köld, nota ég trekt og sikti til þess að hella henni ofan í flöskuna og svo er hægt að nota hana nokkrum sinnum. Á endanum fer ég með flöskuna fulla af olíu á gámavöllinn. 

Saturday, 2 April 2016

Kjúklinganaggar með Doritoshjúp

Og enn elda ég kjúkling. Við bara fáum ekki leið á honum enda eru til svo ótal margar leiðir til að elda hann. Í kvöld langaði mig í kjúklinganagga en ég er nýbúin að sjá uppskrift af mozzarellastöngum með Doritos svo ég ákvað að prófa að gera það sama við kjúkling.

Ég notaði í þessa uppskrift:
3 kjúklingabringur
1 poki Doritos með nacho cheese (í appelsínugulum poka)
(1 poki var ekki nóg)
2 egg
smá mjólk
hveiti með smá salti útí
djúpsteikingarolía

Skerið bringurnar í hæfilega litla bita, Myljið snakkið smátt - hægt að gera í matvinnsluvél eða setja í ziploc poka og rúlla yfir með kökukefli. Eða eitthvað. Pískið egg og smá mjólk saman í eina skál og setjið hveiti í aðra. Svo tekur maður bitana, veltir upp úr hveiti, næst eggjablöndu og síðast Doritos. Passið að snakkið hylji bitana vel. Raðið á disk. Þetta er svolítið tímafrekt svo það er allt í lagi að byrja svolítið snemma. Ég lét svo olíuna hitna á meðan.

Bitarnir eru svo steiktir í olíunni þar til þeir verða gullinbrúnir, þá eru þeir veiddir upp út og settir á eldhúspappír svo olína renni af. Við borðuðum þetta með frönskum kartöflum, salati og salsa sósu :-)

Þetta verður klárlega gert aftur!

Sunday, 22 November 2015

Kjúklinga Wellington

Eins og mér finnst nautakjöt Wellington hryllilega gott, þá er nú ekki eins og maður sé að kaupa sér
nautalund sisvona fyrir sunnudagssteik og það bara í nóvember! Kjúklinga Wellington er því svolítið ódýrari útfærsla. Ég rakst á þetta á einhverju vafri á netinu (því auðvitað dettur mér ekkert svona í hug sjálfri) en sú uppskrift var með aðeins fleiri hráefnum en mér finnst gott að hafa bara rauðlauk og sveppi svo ég ákvað að vera ekkert að breyta því. Afhverju að breyta því sem er nú þegar gott? Djók! Auðvitað á maður að prófa eitthvað nýtt.
Þeir sem þekkja mig vita að mér finnst sveppir vondir. Ekki bara vondir heldur algjör viðbjóður. En í mauki við rauðlauk finn ég hvorki sveppabragð né áferðina. Eitthvað hljóta þeir þó að gera blessaðir svo ég hef þá alltaf með.

Það sem þarf:
Smjördeig
Kjúklingabringur
Olía til steikingar
Rauðlaukur (ca 3)
Sveppir (eftir smekk, ég var með uþb. hálfa öskju)
Egg og mjólk til að pensla.

Byrjið á að krydda kjúklingabringur og steikja á pönnu í heilu lagi. Ég var með þrjár bringur, því við vorum þrjú í mat. Ég steikti þær í olíu, á stillingu 7 af 9 í dálítinn tíma. Ekki steikja þær samt alveg í gegn. Takið af pönnunni og geymið.

Næst skerið þið rauðlaukinn og sveppina mjög smátt. Steikið á pönnu við vægan hita. Aftur notaði ég stillingu 7 af 9. Þetta tekur dágóðan tíma og það þarf að hræra annað slagið í svo þetta brenni ekki.

Á meðan er gott að fletja út smjördeigið. Ég notaði eina heila plötu fyrir hverja bringu. Leggjið útflatta plötu á bökunarpappír á pönnu (því það er erfitt að færa þetta á milli eftir að kjúklingurinn er kominn á, án þess að deigið rifni). Setjið ca 2 matskeiðar af laukmaukinu ofan á deigið og leggjið kjúklingabringu þar ofaná. setjið annað eins af mauki ofan á bringuna og jafnvel á hliðarnar ef þið getið. Ég setti bringuna á annan helminginn á deiginu en það er sjálfsagt hægt að setja beint á miðjuna. Gott er að pensla brúnirnar með hrærðu eggi og smá mjólk svo þær límist betur saman eftir að hinn helmingurinn af deiginu er lagður yfir kjúklinginn og þannig er honum pakkað inn.
Penslið yfir allt saman og bakið í ca 25 - 30 mínútur. Berið fram með meðlæti að eigin vali - eða bara ekki neinu :-)